काठमाडौँ: सरकारले अब वालवालिकाहरुको लागि पनि कोभिड-१९ विरुद्धको खोप ल्याउने भएको छ । स्वास्थ्य राज्यमन्त्री उमेश श्रेष्ठले बालबालिकाका लागि फाइजर र मोर्डना कम्पनीको कोभिड विरुद्धको खोप ल्याउने तयारी भइरहेको जानकारी दिनु भएको छ ।
आज प्रतिनिधिसभाको बैठकमा बोल्दै उहाँले विद्यार्थीहरुको नियमित रुपमा पठन पाठन रोकिएकोले त्यसलाई अघि बढाउन विद्यार्थीलाई खोप लगाउने सरकारको कार्ययोजना रहेको जानकारी दिनुभएको हो ।
उहाँले हालसम्म १ करोड ८ लाख ६० हजार १ सय ७० मात्रा खोप नेपाल आएको र ३ करोड ३६ लाख खोपको मात्रा आउने प्रक्रियामा रहेको बताउनु भयो । उहाँले आगामी असोजसम्म १ करोड ८ लाख थप खोप नेपाल आइपुग्ने दावी गर्नु भयो । माघ मसान्तसम्म ३ करोड २३ लाख थप खोप प्राप्त हुने बताउँदै उहाँले कुल ५ करोड २३ लाख खोप पुग्ने जानकारी दिनुभयो ।
हालसम्म ४५ लाख ७० हजार ५ सय ५३ जनाले पहिलो मात्राको खोप लगाएका छन भने २८ लाख ८८ हजार ३ सय ६९ जनाले पूर्ण मात्राको खोप लगाएका छन् । भेरोसेल खोप ९ लाख मात्रा, अस्ट्राजेनिका ११ लाख ५० हजार मात्रा र जोन्सन २१ हजार मात्रा गरी २० लाख ७१ हजार मात्रा खोप स्थानीय तहमा भण्डारमा राज्यमन्त्री उमेश श्रेष्ठले जानकारी दिनुभयो।
यस्तै केन्द्रीय भण्डारमा अस्ट्राजेनिका १ लाख ६१ हजार मात्रा र जोन्सन १२ हजार मात्रा गरी कुल १ लाख ७३ हजार मात्रा रहेको उहाले बताउनु भयो । नेपालमा कोरोनाबाट १० हजार १ सय ८० जनाले ज्यान गुमाएका छन् । भने हालसम्म नेपालमा पिसिआर र एन्टिजेन बिधिबाट कुल ७ लाख ९५ हजार ३ सय ९१ जनामा कोरोना संक्रमण पुष्टि भएको छ ।
जसमा ६ लाख ७५ हजार कोरोना संक्रमणबाट निको भएको र निको हुने दर ९३ प्रतिशत रहेको उहाँले जानकारी दिनु भयो । ९६ वटा प्रयोगशालाबाट पिसिआर बिधिबाट परीक्षण गरिने र ६८ वटा सरकारी प्रयोगशालाबाट निःशुल्क कोरोना परीक्षण गरिने गरेको उहाँले जानकारी दिनुभयो ।
